Եթե որոշես, որ ժամանակն է շուրջդ նայելով քայլելու, ապա մոտեցիր թերթի կրպակներից որևէ մեկին, քանի որ պատմվածքներս կարող ես կարդալ «tvալիք» շաբաթաթերթի համարներում:
Գարնանային էտյուդներ
Անդարձ կարոտով բողբոջող ներկայից մի կաթիլ կաթնաջուր է հոսում, սնուցում ճյուղն ապագայի։ Չորացրած ձմռան անցյալ բնավորությունը ճաքերի էր բաժանել ինչ-որ այգու մարդկային կոկորդը, որից որպես բերք միտք է ծնվում։
Փշաքաղությունը մեջքով վազում էր, ծաղկափոշին քթով գարուն էր ներարկում։ Տարիների արտահոսքը ամեն գարուն զգացնել է տալիս բնության հասակը, որ մարդ է կոչվում։ Սրտով արագություն է քամվում, երակներով մարդիկ են վազում, աչքերում՝ մեղքի կրակներ։ Շուրթերը տաք են, օդը ներսում եռում է ու խարկում ամեն տեսակ մթնոլորտ։
Նորից ծնվում է ինչ-որ առաջնեկ, որ փոխելու է նախորդների չիրագործած ապագան։
***
- Վերև, միայն վերև, մի քիչ էլ վերև, արի դեպի ինձ, գլուխդ բարձր, դե, կարող ես, ձգվիր, չէ որ արժանի ես համբույրիս։ Հպարտ արի, գոհ արի, չփնթփնթաս, նորից ես ծնվում։ Կամք կա քո մեջ, ինձ ես օգնելու, որ հավատանք մեր ուժերին,- ամեն գարուն ամեն ծաղկի ասում էր արեգակնամայրը տիեզերքի:
ՇարունակՎել
Մեր մատնահետքերից սկսած մինչև սոցկայքային գաղտանբառեր մենք արտառոց տարբեր ենք։ Նպատակներին հասնելիս հազար ուղիներ ենք մաքրում, հետո վազում նոր տերևաթափ եղած ծառուղին, որովհետև մեզ դուր է գալիս կյանքն ապրելը, այդ ընթացքում պետքական լինելը։ Վախենում ենք ձանձրանալուց, ամեն գնով ստեղծում ենք առիթներ, որ տան բազկաթոռը քիչ հանդիպի մեր հետույքին։
ՇարունակՎելն էլ կենսակերպ է։
Փողոցում ծեծվողը հենց գլուխը բարձրացնի գետնից, ուրեմն շարունակՎում է։ Հենց սիրախեղդը մոռացավ իր հիվանդագին զգացմունքն, ուրեմն շարունակՎում է։ Հենց ներեցինք մեզ նեղացնողին՝ շարունակՎում ենք ու թույլ տալիս դիմացինին, որ շարունակՎի։
Սրա հակառակն է աղետ, երբ կանգնած ես մայթեզրին ու նայում ես կյանքի մարդաշատ երթևեկին ու դու չկաս ոչ մի կյանքային պատմության ղեկին։ Կանգնած հետևում ես, հետևությունների հասնում ու հասկանում, որ ինչպես կրթական համակարգում, այնպես էլ այստեղ տեսլականդ դիր գրպանդ, հավաքիր քեզ ու մանկության վախերիդ պես հաղթահարիր կյանքի հոսքը, թռիր այնտեղ, որտեղ իրարից այդքան տարբեր հերոսները կոչված են մարդ։ Այդժամ կգիտակցես, որ սա մկրտության պես մի բան է, կամ էլ՝ անհավատի հարցերի պատասախններն ունեցող կրոն։
© Շ․ Ասատրյան
Комментарии
Отправить комментарий